Наталля (hardzin) wrote,
Наталля
hardzin

Эміграцыйная гісторыя ў асобах. 15 верасня. Залога, Зарэчны, Суравы

МІКОЛА ЗАЛОГА (нар. 15.09.1924), грамадзкі дзеяч. Паходзіць зь Берасьцейшчыны. У часе Другой сусьветнай вайны служыў у беларускай паліцыі ў Косаве. Летам 1944 г. быў далучаны да 30-й грэнадэрскай дывізіі СС, перайшоў на бок саюзьнікаў, затым служыў у 2-м Польскім корпусе. У Вялікабрытаніі з 1946 г., пасяліўся ў Лёндане. Ад 07.12.1946 быў сябрам Згуртаваньня беларусаў у Вялікай Брытаніі, аднак далучыўся да апазыцыі і ад 1948 г. стаў сябрам Хрысьціянскага аб'еднаньня беларускіх работнікаў. Быў сакратаром Лёнданскага акруговага цэнтру арганізацыі. Пазьней стаў сябрам Беларускага вызвольнага фронту, быў кіраўніком лёнданскага Цэнтру арганізацыі, уваходзіў у кіраўніцтва Краёвага штабу БВФ у Вялікабрытаніі. Быў аўтарам тэкстаў у арганізацыйным часопісе “Барацьба” (Нямеччына). Стаў сябрам парафіі Сьв. Эўфрасіньні Полацкай у Лёндане, сябрам царкоўнага камітэту.

Сустракалася з Міколам Залогам у 2005 г. і гэтае спатканне было вельмі запамінальнае. Ён з ахвотаю распавядаў пра часы вайны, пра службу ў войску і ніяк не хацеў пераходзіць да жыцця ў Брытаніі, што мяне найбольш цікавіла :)


Здымак зроблены ў часе нашага адзінага спаткання з Міколам Залогам у ягонай лонданскай кватэры ў 2005 г.

ЛЮДВІК ЗАРЭЧНЫ (сапр. Галубовіч, 17.05.1915, Ратамка пад Мінскам — 15.09.1964, Мюнхен-Гладбах, Нямеччына), вайсковы і грамадскі дзеяч. Праз хваробу бацькі мусіў кінуць школу і ў 16 гадоў пайсці працаваць. Уладкаваўся на сакратарскую працу ў трэсце “ЛесБел”. Пазней, магчыма, працаваў у іншых установах цягам чатырох гадоў. Атрымаць вышэйшую адукацыю не паспеў. У 1935 г. быў асуджаны на шэсць гадоў зняволення, аднак праз пяць гадоў вызвалены і працаваў у Хабараўску. У Беларусь вярнуўся ў 1941 г. і хутка быў мабілізаваны ў Чырвоную Армію. Трапіў у нямецкі палон, з якога быў вызвалены ўвесну 1942 г. Працаваў у структуры Вермахту. Займаў становішча інспектара пры 9-й Арміі па наглядзе за дзейнасцю мясцовых аддзелаў паліцыі, а таксама працаваў на іншых пасадах. Пасля капітуляцыі Нямеччыны больш за два гады знаходзіўся пад арыштам. Аднак па вызваленні навязаў кантакты з Брытанскай адміністрацыяй у Нямеччыне і ў 1949—1953 гг. працаваў у сістэме Брытанскай кантрольнай камісіі на Нямеччыну на становішчы дарадчыка па пытаннях савецкай сістэмы і яе органаў. Здолеў зацікавіць Брытанскую выведку справай арганізацыі беларускага збройнага супраціву ў БССР, ладзіў навучанне дыверсійных групаў. У 1952 г. пры падтрымцы Р. Астроўскага заснаваў арганізацыю беларускіх вайскоўцаў на эміграцыі Беларускі вызвольны рух, які дэклараваў сваю цесную сувязь з антысавецкім падполлем у Беларусі. У 1955 г. адышоў ад справаў арганізацыі і беларускага жыцця наогул. Праз некаторы час стаў падпісвацца як “ксёндз Людвік Тытулярны Пастар Копыльскага Рэфармаванага Каталіцкага Кальвінскага Касьцёлу”.

Людвік Зарэчны - адзін з маіх улюбёных герояў на эміграцыі, бо авантурнік, пра якога хацелася б ведаць болей. У мінулым нумары Запісаў зрабіла тэкст, заснаваны на ягоным ліставанні з Дзмітрыем Касмовічам.

БАРЫС СУРАВЫ (15.09.1907 – сьнежань 1998), грамадзкі дзеяч. Паходзіў са Стаўпеччыны. Скончыў Віленскі ўнівэрсытэт. Падчас нямецкай акупацыі працаваў школьным інспэктарам, быў кіраўніком СБМ на Слонімскую акругу. Улетку 1944 г. выехаў у Нямеччыну, адкуль перабраўся ў Вялікабрытанію, жыў у Лёндане. Ад 01.09.1947 г. быў сябрам ЗБВБ, але за падтрымку апазыцыі пазбаўлены сяброўства. 15.03.1948 увайшоў у Часовую ўправу ХАБР (віцэ-старшыня), а таксама ў рэдакцыю часопіса “Аб’еднаньне” (пісаў пад псэўданімам Старшы Праваднік). У сьнежні 1948 г. быў абраны старшынём Галоўнай управы ХАБР. На гэтую пасаду абіраўся некалькі разоў (быў старшынём у 1948–1950 гг. і 1954–1966 гг., да зьнікненьня арганізацыі). У 1948–1953 гг. быў кіраўніком Прадстаўніцтва БЦР у Вялікабрытаніі. У 1960–1980-я гг. удзельнічаў у жыцьці лёнданскай парафіі Сьв. Эўфрасіньні Полацкай. Пры канцы жыцьця быў паралізаваны. Памёр у Лёндане.
Tags: асобы, каляндар, эміграцыя
Subscribe
  • Post a new comment

    Error

    default userpic

    Your reply will be screened

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 0 comments