Наталля (hardzin) wrote,
Наталля
hardzin

Эміграцыйная гісторыя ў асобах. 2 кастрычніка. Сяргей Ахатэнка, Тамаш Падзява

І яшчэ адзін дзень звязан з імёнамі двух рэлігійных асобаў беларускай эміграцыі, гэтым разам праваслаўнага і каталіка.

СЯРГЕЙ (сапр. Ягор Ахатэнка (12.03.1890 — 02.10.1971), рэлігійны дзеяч, архіяпіскап, глава БАПЦ. Нарадзіўся ў в. Малыя Гарошкі ў Жытомірскім павеце (Украіна) у сялянскай сям’і. У 1911 — 1921 гг. — у Богаяўленскім манастыры ў Жытоміры, дзе ў 1919 г. прыняў манаскі сан. У 1925 г. высьвечаны на субдыякана, а ў 1932 г. — архімандрыта. Працаваў у праваслаўных парафіях ва Ўкраіне, пакуль ў 1937 г. ня быў арыштаваны савецкімі ўладамі. Вызвалены ў 1941 г. На Кіраваградзкім катэдральным саборы (1.08.1943) высьвячаны ў япіскапы. Ад лета 1944 г. — у Нямеччыне. Удзельнік Першага сабору БАПЦ 4-5.06.1948 г. у Канстанцы, на якім быў прызнаны архіяпіскапам і ўвайшоў у Часовую Раду БАПЦ. У 1950 г. перабраўся ў Аўстралію. Кіраўнік БАПЦ на Аўстралію й Новую Зэляндыю. Да 1957 г. жыў у Сыднэі. Потым перабраўся ў Пэрт, дзе прычыніўся да збору сродкаў на пабудову беларускай царквы, а пазьней — у Адэляйду, дзе абслугоўваў некалькі грэцкіх парафіяў. Пахаваны на грэцкіх могілках у Адэляйдзе паводле грэцкага абраду (седзячы).


Архіяпіскап Сяргей


Архіяпіскап Сяргей ў Перце (Заходняя Аўстралія), 1950-я гг.

Архіяпіскап Сяргей у беларускай царкве ў Перце

Архіяпіскап Сяргей ў Перце

ТАМАШ ПАДЗЯВА (06.02.1906 – 02.10.1975). Нарадзіўся ў в. Перхулёва Друйскай парафіі. У 1926 г. уступіў у навіцыят марыянаў у Друі. У 1929 г. скончыў гімназію і выехаў на навучаньне ў Рым. У 1931 г. атрымаў ступень доктара філязофіі, а ў 1935 г. – ліцэнцыята тэалёгіі. 23 сьнежня 1934 г. атрымаў сьвятарскія сьвячэньні. У 1935 г. выехаў у Харбін, дзе быў выхавальнікам у ліцэі Сьв. Мікалая, а таксама выкладчыкам рэлігіі. Публікаваўся у “Каталіцкім Весьніку”. У 1938–1939 гг. быў магістрам навіцыяту. У 1948 г. разам зь іншымі сьвятарамі быў схоплены кітайскімі жаўнерамі, перададзены НКУС і вывезены ў турму ў Чыце. Асуджаны на 25 гадоў лягераў. Пакараньне адбываў у Тайшэтлягу. У 1955 г. быў вызвалены, атрымаў магчымасьць выехаць у Польшчу, дзе нейкі час выкладаў у сэмінарыі, актыўна друкаваўся. У 1969 г. выехаў у Рым, а адтуль у Лёндан пад апеку біскупа Часлава Сіповіча. Шмат друкаваўся на старонках часопіса “Божым Шляхам”. Памёр і пахаваны ў Лёндане на St. Pancras cemetery.


Тамаш Падзява

Магіла Тамаша Падзявы ў Лодане.
Tags: асобы, каляндар, эміграцыя
Subscribe
  • Post a new comment

    Error

    default userpic

    Your reply will be screened

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 1 comment