Наталля (hardzin) wrote,
Наталля
hardzin

Эміграцыйная гісторыя ў асобах. 23 кастрычніка. Міхась Зуй, Мікола Скабей

МІХАСЬ ЗУЙ (23.10.1909, в. Вялікае Сяло, сёньня Шаркаўшчынскі р-н Віцебскай вобл. — 24.04.1995), грамадзкі дзеяч. Падчас нямецкай акупацыі працаваў у структурах БНС, начальнікам Шаркаўшчынскага павету. У 1949 г. выехаў у Аўстралію. Браў удзел у першым сходзе сяброў Беларускага Аб’еднаньня ў Новай Паўднёвай Валіі (Новы Паўднёвы Уэльс) у сакавіку 1950 г., пазьней — стваральнік і нязьменны старшыня Беларускага Аб’еднаньня ў Аўстраліі (БЦРаўскага кірунку). Кіраваў дэлегатурай БЦР у Аўстраліі, у 1977—1978 гг. — старшыня выканаўчага камітэту Фэдэральнай Рады Беларускіх Арганізацый у Аўстраліі. У 1987 г. на XIX пленуме БЦР абраны прэзыдэнтам Беларускай Цэнтральнай Рады.

Багатае ліставанне Міхася Зуя захоўваецца ў архіве Дзмітрыя Касмовіча.


Алесь Алехнік доўгі час выконваў сакратарскія функцыі пры Міхасю Зую, праўда, у адзін момант запатрабаваў аплаціць яму ўсе гады працы. На тым і развіталіся і Алехнік зусім ад беларускай грамадскай працы адышоў. На здымку Міхась Зуй і Алесь Алехнік недзе ў пачатку 1980-х.


Напэўна, адзін з апошніх здымкаў Зуя (справа). Хто з ім побач - невядома.


Сяброўская картка Міхася Зуя як сябра Беларускага вызвольнага фронту.




Магіля Міхася Зуя на беларуская-ўкраінскай частцы могілак у Сіднэі.

МІКОЛА СКАБЕЙ (23.10.1905—7.12.1992), грамадзкі дзеяч. Месца нараджэньня невядомае. У 1944 г. быў дэлегатам на Другім Ўсебеларускім Кангрэсе, адразу пасьля якога выехаў зь Беларусі. Пасьля некалькіх гадоў у Нямеччыне, у 1948 г. прыехаў у Аўстралію. Некаторы час быў на чале сэктару Рады БНР у Вікторыі. У 50-х гадах стаўя на чале Згутраваньня беларусаў у Вікторыі, а пасьля стварэньня агульнага Беларускага Цэнтральнага Камітэту стаў першым яго кіраўніком, і далей рэгулярна выбіраўся на гэтую пасаду на працягу 60—80-х гадоў. Пры ягоным кіраўніцтве была наладжаная пры падтрымцы БЦК праца чарговай беларускай школы. Адзін з ініцыятараў набыцьця Беларускага Дому і ўдзельнік Управы Каапэратыву Беларускага Дому. Актыўна падтрымаў ідэю арганізацыі Сустрэчаў Беларусаў Аўстраліі. Падтрымліваў цесныя сувязі зь беларускімі эмігрантамі ў іншых краінах сьвету, і ў прыватнасьці зь Міколам Абрамчыкам. Пахаваны на беларускай дзялянцы могільніку Фолкнэр ў Мэльбурне.

Калі не памыляюся, Скабей ліставаўся з Янкам Філістовічам. Гэтае ліставанне ёсць у архіве Скарынаўкі.


Мікола Скабей сябраваў з сям'ёй Алеся Салаўя. На гэтым здымку ён з Зінай Кадняк і Алесем Салаўём пасля паходу ў грыбы недзе каля Мельбурну.



Біскуп Часлаў Сіповіч і Мікола Скабей у Мельбурне. !968 (?) г.


Адзін з апошніх здымкаў Алеся Салаўя. Тут Мікола Скабей, Антон Адамовіч і Алесь Салавей. 1977 г.



Магіла Міколы Скабея на беларускім могільніку ў Мельбурне
Tags: асобы, каляндар, эміграцыя
Subscribe
  • Post a new comment

    Error

    default userpic

    Your reply will be screened

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 0 comments